ᑯᒀᒋᔅᒑᒧᐎᓐᐦ ᑭᔮᐦ ᓂᔥᒀᐅᔑᐦᐄᐙᐎᓐᐦ

1. ᑖᓐ ᐋ ᐃᑖᐱᑎᓰᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ?
ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᓈᓈᑭᒋᐦᑖᐅᒡ ᐋ
ᓂᑑᒋᔅᒑᔨᐦᑖᑭᓂᐎᔨᒡ ᐋ ᐃᔑ ᑖᐦᑭᐦᐄᒑᐱᔨᔨᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐊᓂᑦᐦ
ᐱᒫᑎᓰᐎᓂᐦᒡ ᑭᔮᐦ ᐊᔅᒌᐦᒡ ᐊᓂᑖᐦ ᒉᐃᒥᔅ ᐯᐃ ᐊᔅᒌᐦᒡ ᐲᓯᒸᐦᑖᐦᒡ ᐊᓐ 55 ᑳ ᐃᑎᓯᓈᑖᒡ ᑳ
ᐱᒫᐹᔥᑯᔥᑖᒡ ᐊᔅᒌᐅᓯᓂᐦᐄᑭᓂᐦᒡ᙮ ᐊᓄᐦᒌᐦᒑ ᒫᒃ, ᐋᐅᒄ ᐅᓵ ᑳ ᓂᑑᒋᔅᒑᔨᐦᑖᑭᓂᐎᒡᐦ ᐋ ᐐᐦ
ᓅᑎᓯᓈᓃᐎᒡ, ᐋ ᒫᔅᑭᓈᐦᒑᓂᐎᒡ, ᑭᔮᐦ ᓂᒥᔅᒌᐤ ᐃᔥᑯᑖᐅᑭᒥᒄ ᐋᐱᑎᓰᐎᓐᐦ᙮

2. ᑖᐃᔅᑉ ᑳ ᐅᔑᐦᑖᑭᓂᐎᒡ ᐊᓐ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ?
1975 ᑳ ᐃᔅᐱᔨᒡ ᒌ ᐅᔑᐦᑖᑭᓂᐎᐤ ᐊᓐ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ ᐅᐦᒋ ᐊᓐ ᐋ ᒋᔅᒋᓂᐙᐱᐦᑖᑭᓂᐎᒡ ᐱᔅᑭᒋᓯᓂᐦᐄᑭᓐ 22 ᐅᐦᒋ ᐊᓐ ᒉᐃᒥᔅ ᐯᐃ ᑭᔮᐦ
ᒌᐙᑎᓐ ᑯᐯᒃ ᓂᔅᑯᒧᐎᓐ (JBNQA), ᐙᔥ ᐋᔪᐎᒄ ᐅᔮ ᑳ ᒥᓯᓂᐦᐆᓱᒡ ᑯᐯᒃ ᑎᐹᔨᐦᒋᒑᓯᐤ,
ᐦᐋᐃᑎᕉ-ᑯᐯᒃ ᑭᔮᐦ ᐐᓂᐹᑰᒡ ᓅᐦᒋᒦᐤ ᐄᓅᒡ ᐁ ᓈᑎᒫᑐᒡ ᐅᐦᒋ ᑯᐯᒃ᙮ ᐊᓐ ᐋ ᐃᔑ ᐐᔓᑖᒡ
ᐱᔅᑭᒋᓯᓂᐦᐄᑭᓐ 22, ᐋᑯᑦᐦ ᐙᐦᒋ ᔮᔨᒋᐦᑖᒡ ᐅᐦᒋ ᐊᓐ ᑳ ᐲᐦᑎᑖᐱᔨᐦᑖᑭᓂᐎᒡ ᑯᐯᒃ ᐊᔅᒌ ᐋ
ᐃᔥᐱᔥ ᒥᔪᓈᑯᐦᒡ ᐐᔓᐙᐎᓐ᙮

3. ᒑᒄ ᐊᔅᒌᔨᐤ ᓂᔮᓈᑭᒋᐦᑖᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ?
ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐅᑖᐱᑎᓰᐎᓂᐙᐤ,
ᐋᑯᑦᐦ ᐋ ᐊᑯᓂᐦᐄᒑᐱᔨᔨᒡ ᑯᐯᒃ ᐊᔅᒌᐦᒡ ᐊᓂᑦᐦ ᐋ ᐅᐦᒋ ᐐᔓᑖᒡ JBNQA ᓂᔅᑯᒧᐎᓂᐦᒡ ᑭᔮᐦ
ᐲᓯᒸᐦᑖᐦᒡ ᐊᓐ 55 ᑳ ᐃᑎᓯᓈᑖᒡ ᑳ ᐱᒫᐹᔥᑯᔥᑖᒡ ᑭᔮᐦ ᐊᒋᔥᑑ 69 ᑳ ᐃᑎᓯᓈᑖᒡ ᑳ ᐱᒫᐹᔥᑯᔥᑖᒡ
ᐊᔅᒌᐅᓯᓂᐦᐄᑭᓂᐦᒡ᙮ ᐋᐅᒄ ᑭᔮᐦ ᒋᒡ ᐊᓐ I ᑭᔮᐦ II ᑳ ᐃᑎᓯᓈᑖᒡ ᐊᔅᒌ ᐊᓂᑖᐦ ᐙᐱᒫᑯᔥᑐᐃ,
ᐄᔨᔨᐤ ᐃᐦᑖᐎᓐ ᐊᐱᔒᔥ ᐊᑎᒫᐲᓯᒽ ᐊᓂᑖᐦ 55 ᑳ ᐃᑎᓯᓈᑖᒡ ᑳ ᐱᒫᐹᔥᑯᔥᑖᒡ
ᐊᔅᒌᐅᓯᓂᐦᐄᑭᓂᐦᒡ᙮ ᐋᐅᒄ ᐋ ᐃᔑᓈᑯᓂᔨᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐅᑖᐱᑎᓰᐎᓂᐙᐤ ᐋ ᐊᑯᓂᐦᐄᒑᐱᔨᔨᒡ ᐊᓂᑖᐦ ᑖᑖᐅᒡ ᑭᔮᐦ
ᐊᑎᒫᐲᓯᒽ ᐊᓐ ᒉᐃᒥᔅ ᐯᐃ ᐊᔅᒌ᙮ ᐋᐅᒄ ᐋ ᐊᔥᒋᐱᔨᒡᐦ ᐊᓂᐦᐄ ᐹᔨᑯᔥᑖᐤ ᐄᔨᔨᐤ/ᐄᓅ ᐃᐦᑖᐎᓐᐦ
(ᐅᒉᐴᑯᒨ, ᒥᔅᑎᓯᓃ, ᐙᔂᓂᐲ, ᓇᒣᔅᑳᐤ, ᐙᔅᑳᐦᐄᑲᓂᔥ, ᐄᔅᒣᓐ, ᐐᒥᓂᒌ, ᒋᓵᓰᐲ ᑭᔮᐦ
ᐙᐱᒫᑯᔥᑐᐃ) ᑭᔮᐦ ᐊᓐ ᐊᔅᒌ ᐊᓂᑖᐦ ᔑᐴᑲᒨ ᑭᔮᐦ ᔖᐯᐃ ᐃᐦᑖᐎᓐᐦ᙮ ᒋᑭ ᒌ ᐙᐱᐦᑖᓐ
ᐊᔅᒌᐅᓯᓂᐦᐄᑭᓐ ᐅᐦᒋ ᐆ ᐊᔅᒌ ᐊᓂᑦᐦ ᓃᔥᑖᒥᐦᒡ ᐋ ᓅᑯᐦᑖᑭᓂᐎᒡ ᒑᒀᓐ ᓂᑑᒋᔅᒑᔨᐦᑎᒧᐙᑭᓂᐦᒡ᙮

4. ᑖᓂᑖᐦ ᐋ ᐃᔑ ᐋᐱᑎᓰᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ?
ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᐋᐅᒄ ᓂᔮᔪ ᐋ
ᐃᐦᑎᔑᒡ, ᓂᔥᑐ ᐊᓂᑖᐦ ᐅᐦᒋ ᐅᔮᔨᒫᑭᓂᐎᐎᒡ ᑯᐯᒃ ᑎᐹᔨᐦᒋᒑᓰᓈᐦᒡ (ᒋᒡ ᐅᒋᒫᐤ), ᑭᔮᐦ ᓃᔓ ᐅᐦᒋ
ᐅᔮᔨᒫᑭᓂᐎᐎᒡ ᐊᓂᑖᐦ ᐄᔨᔨᐤ/ᐄᓅ ᑎᐹᔨᐦᒋᒑᐎᓂᐦᒡ᙮ ᒫᒀᒡ ᐋ ᐙᐙᐱᐦᑎᐦᒡ ᐋᐱᑎᓰᐎᓂᔨᐤ, ᐊᓂᒌ
ᑯᐯᒃ ᑎᐹᔨᐦᒋᒑᓰᓈᐦᒡ ᑳ ᐅᐦᒋ ᐅᔮᔨᒫᑭᓂᐎᒡ ᒋᑭ ᒌ ᒥᔻᐱᒋᐦᑖᐅᒡ ᐊᓂᔮ ᑳ ᐃᔑ
ᓂᑑᒋᔅᒑᔨᐦᑖᑭᓂᐎᔨᒡ ᒑ ᐃᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ ᐅᐦᒋ ᐊᓂᐦᐄ ᐊᑎᒫᐲᓯᒽ ᑭᔮᐦ ᓅᑎᓯᓈᐤ
ᐋᐱᑎᓰᐎᓐᐦ ᐋ ᒌ ᐅᐦᒋ ᓂᑑᒋᔅᒑᔨᐦᑖᑭᓂᐎᒡ ᐊᓂᑖᐦ ᑎᐹᔨᐦᒋᒑᓯᐤ ᑳ ᓈᓈᑭᒋᐦᑖᑦ ᐋ ᐅᔑᐦᑖᑭᓂᐎᒡ
ᐱᑳᔅᒋᐦᐅᐎᓐ, ᐊᔅᒌ ᑭᔮᐦ ᐋ ᒫᔑᐦᑖᑭᓂᐎᒡ ᐃᔨᐦᒡ ᐋ ᐃᔅᐱᔨᒡ ᒌᔑᒄ (MDDELCC)᙮ ᐆ ᐋ ᐃᔑ
ᐙᐙᐱᐦᑖᑭᓂᐎᒡ, ᐋᐅᒄ ᐋ ᐃᔮᐱᒋᐦᑖᑭᓂᐎᒡ ᐊᓂᔮ ᑳ ᐃᔑ ᒥᔅᑭᐙᐦᑖᒡ MDDELCC ᑭᔮᐦ
ᐊᓂᐦᐄ ᑯᑎᒃᐦ ᐋᐱᑎᓰᐎᓐᐦ ᐋ ᐃᔑ ᐐᒋᐦᐄᐙᐱᔨᒡᐦ᙮ ᒥᓯᐙ ᐊᓐ ᒑᒀᓐ ᓂᑑᒋᔅᒑᔨᐦᑖᑭᓂᐎᐤ ᒑ ᒌ
ᐋᔨᒧᑖᑭᓂᐎᒡ, ᑭᔮᐦ ᐋᐅᒄ ᐋ ᓂᑐᒫᑭᓂᐎᒡ ᒑ ᐊᔨᒥᒡ ᐊᓂᒌ ᑳ ᒥᔪᒋᔅᒑᔨᐦᑎᐦᒡ ᒑᒀᔨᐤ ᐋ
ᓂᑑᒋᔅᒑᔨᐦᑖᑭᓂᐎᔨᒡ᙮ ᐊᓂᒌ ᒫᒃ ᐄᔨᔨᐅᒡ/ᐄᓅᒡ ᑳ ᐊᔥᑎᐱᒡ, ᐋᔪᐎᒄ ᐋ ᐃᔮᐱᒋᐦᑖᒡ ᑳ
ᒥᒋᓈᐱᐦᑎᒥᔨᒡᐦ ᒑᒀᔨᐤ ᐊᓂᑖᐦ ᐋ ᐃᔑ ᐋᐱᑎᓰᔨᒡᐦ ᐄᔨᔨᐤ/ᐄᓅ ᑎᐹᔨᐦᒋᒑᐎᓂᐦᒡ᙮ ᒫᒀᒡ ᐋ
ᓂᔥᑐᔨᒡ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᐋᐅᒄ ᐋ
ᐃᔮᔨᒧᑖᑭᓂᐎᒡ ᐊᓐ ᒥᓯᐙ ᑳ ᐃᔑ ᒥᒋᓈᐱᐦᑖᑭᓂᐎᒡ᙮ ᒥᔔ ᑳ ᒌᔑᐱᔨᒡ ᐊᓐ ᐋ ᐃᔮᔨᒧᑖᑭᓂᐎᒡ
ᒑᒀᓐ, ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐋᔥᑑᓈᔥᑖᐅᒡ
ᐅᐦᒋ ᐊᓂᔮ ᒫᐦᒋᒡ ᐋ ᐃᔑ ᓂᑎᐙᔨᐦᑎᐦᒡ ᐋ ᑭᓂᐙᐱᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᑭᔮᐦ ᐋᔪᐎᒄ
ᐹᐦᑖᐱᔨᐦᑖᑭᓂᐎᔨᒡ ᐊᓂᔮ ᑳ ᐃᔑ ᐅᔮᔨᐦᑎᐦᒡ᙮

5. ᑖᐃᔅᑉ ᐋ ᓂᔥᑐᔨᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ ᑭᔮᐦ ᑖᐃᔅᑉ ᒑ ᒌ ᐙᐱᐦᑎᒫᓐ ᓂᔥᑐᔨᐅᓯᓂᐦᐄᑭᓐᐦ?
ᐐᓵᐙ ᐹᔨᒀᐤ ᐋᔑᑯᒻ ᐲᓯᒽᐦ ᓂᔥᑐᔨᐅᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ᙮ ᐊᓂᐦᐄ ᓂᔥᑐᔨᐅᓯᓂᐦᐄᑭᓐᐦ ᓅᑯᐦᑖᑭᓂᐎᐤᐦ ᐊᓂᑖᐦ COMEX
ᐋ ᐅᐦᒋ ᓅᑯᐦᑖᒡ ᒑᒀᔨᐤ ᓂᑑᒋᔅᒑᔨᐦᑎᒧᐙᑭᓂᐦᒡ ᐋᐦᒸᔮ 45 ᑎᐦᑐ ᒌᔑᑳᐤᐦ ᐋ ᐅᑎᐦᒋᐱᔨᔨᒡ ᑭᔮᐦ
ᒥᔔ ᐋ ᒌ ᔖᐳᐦᑐᐙᐱᔨᐦᑖᒡ ᐊᓂᒌ ᑳ ᐊᔥᑎᐱᒡ᙮

6. ᑖᓂᑖᐦ ᐙᐦᒋ ᐱᒥᐱᔨᒡ ᐊᓐ ᒥᓯᓂᐦᐄᒑᑭᒥᒄ ᐅᐦᒋ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ?
ᐊᓂᒌ ᐊᓂᑖᐦ MDDELCC ᑳ ᐊᔥᑎᐱᒡ ᒑᔥᑎᓈᑖᔮᔨᐦᑖᑯᐦᑖᐅᒡ ᐊᓐ COMEX ᒥᓯᓂᐦᐄᒑᐅᑭᒥᒄ ᒑ
ᒌ ᐱᒥᐱᔨᔨᒡ ᑭᔮᐦ ᐐᐙᐤ ᑎᐱᐦᐊᒧᒡ ᐊᓂᔮ ᐋ ᐊᑎ ᐃᔅᐱᔨᐦᐄᐙᔨᒡᐦ ᔔᔮᓐᐦ᙮ ᐊᓐ ᒥᓯᓂᐦᐄᒑᐅᑭᒥᒄ,
ᐋᑯᑖᐦ ᐋ ᐃᐦᑎᑯᐦᒡ ᐊᓂᑖᐦ ᑯᐯᒃ ᓯᑏ, ᐊᓂᑖᐦ 675 René-Lévesque Blvd. E., Édifice
Marie-Guyart᙮

7. ᑎᐲᐙ-ᐋ ᐱᒥᐱᔨᐦᐄᓲᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ?
ᑮᑆ, ᐹᐦᐹᔨᒄ ᑳ ᐊᔥᑎᐱᑦ ᐊᔓᑎᒫᒑᐤ ᐋ ᒥᓯᓂᐦᐆᓱᑦ ᒑ ᒋᔅᒋᓂᐙᐱᐦᑎᐦᒃ ᐊᓂᔮᐦ ᐐᔓᐙᐎᓐᐦ
ᐅᐦᒋ ᑯᔨᔅᒄ ᒑ ᐃᔑ ᓈᓈᑭᒋᐦᑖᑦ ᐅᑖᐱᑎᓰᐎᓐ ᑳ ᐃᔑ ᐐᔥᑖᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ
ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐐᔓᐙᐎᓐ ᑯᔨᔅᒄ ᐋ ᐃᑖᐱᑎᓰᓈᓂᐎᒡ, ᑭᔮᐦ ᐊᓂᑖᐦ ᑯᐯᒃ
ᐐᔓᐙᐎᓐ ᐋ ᒋᔥᑖᔨᐦᑖᑭᓂᐎᒡ ᑯᔨᔅᒄ ᐋ ᐃᑖᐱᑎᓰᓈᓂᐎᒡ ᐊᓂᑖᐦ ᑎᐹᔨᐦᒋᒑᓰᓈᐦᒡ ᐋ ᐅᐦᒋ
ᐋᐱᑎᓰᓈᓂᐎᒡ᙮

8. ᒑᒀᓐ ᐃᔨᐦᒡ ᐋ ᐃᔑᓈᑯᐦᒡ ᐅᐦᒋ ᐊᓐ ᐋ ᐃᔑ ᓂᑎᐙᔨᐦᑎᐦᒡ ᒑᒀᔨᐤ ᑳ ᒫᒨᐱᒡ ᑳ
ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᑭᔮᐦ ᐊᓐ ᐋ ᐃᔑ ᐅᔮᔨᐦᑎᐦᒃ
ᑯᐯᒃ ᑎᐹᔨᐦᒋᒑᓯᐤ?
ᐊᓂᔮ ᐋ ᐃᔑ ᓂᑎᐙᔨᐦᑎᐦᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ, ᐋᐅᒄ ᐋ ᐃᑎᔑᐦᐊᒧᐙᑭᓂᐎᑦ ᑳ ᐱᒥᐱᔨᐦᑖᑦ ᐋᐱᑎᓰᐎᓂᔨᐤ ᐋ ᒌ ᐅᐦᒋ
ᐅᔮᔨᒫᑭᓂᐎᑦ ᐊᓂᑖᐦ ᑯᐯᒃ ᑎᐹᔨᐦᒋᒑᓰᓈᐦᒡ, ᐋᐅᒄ ᐊᓐ ᑳ ᐅᐦᒋ ᑖᐦᒋᔥᑭᐙᑦ ᑎᐹᔨᐦᒋᒑᓯᐤ
ᐋᐱᒋᐦᐋᑭᓐᐦ ᑳ ᓈᓈᑭᒋᐦᑖᑦ ᐋ ᐅᔑᐦᑖᑭᓂᐎᔨᒡ ᐋ ᐅᐦᒋ ᐱᑳᔅᒋᐦᐅᓈᓂᐎᒡ, ᐊᔅᒌ ᑭᔮᐦ ᐋ
ᒫᔑᐦᑖᑭᓂᐎᒡ ᐃᔨᐦᒡ ᐋ ᐃᔅᐱᔨᒡ ᒌᔑᒄ᙮ ᐊᓐ ᑳ ᐱᒥᐱᔨᐦᑖᑦ ᐋᐱᑎᓰᐎᓂᔨᐤ ᒋᑭ ᐅᔮᔨᐦᑎᒽ ᑖᑆᐦ ᒑ
ᐱᒋᔅᑎᔓᐙᑎᑭᓂᐎᔨᒡ ᑭᔮᐦ ᒫᒃ ᐋᑳ ᒑ ᐱᒋᔅᑎᔓᐙᑎᑭᓂᐎᔨᒡ ᐋᐱᑎᓰᐎᓂᔨᐤ, ᑭᔮᐦ ᒑᒀᓐ ᒑ
ᒋᔅᒋᓂᐙᐱᐦᑖᑭᓂᐎᒡ, ᒀᔣᓐ ᐃᔑᓈᑯᐦᒑ᙮ ᒥᔔ ᑳ ᐱᒋᔅᑎᔓᐙᑭᓂᐎᒡ ᐋᐱᑎᓰᐎᓐ, ᐊᓐ ᑳ
ᐱᒥᐱᔨᐦᑖᑦ ᐋᐱᑎᓰᐎᓂᔨᐤ ᒋᑭ ᐅᔑᐦᑖᐤ ᐱᒋᔅᑎᔓᐙᑖᐅᓯᓂᐦᐄᑭᓂᔨᐤ ᐅᐦᒋ ᐊᓂᔮ ᒑ ᒌ
ᐱᒥᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᑭᔮᐦ ᐋᔪᐎᒄ ᐋ ᐃᑎᔑᐦᐊᒧᐙᑦ ᐊᓂᔮᐦ ᑳ ᐐᐦ ᒋᐦᒋᐱᔨᐦᑖᔨᒡᐦ
ᐋᐱᑎᓰᐎᓂᔨᐤ᙮
ᒀᔣᓐ ᒫᒃ ᐃᔑᓈᑯᐦᒑ ᐊᓐ ᑳ ᐱᒥᐱᔨᐦᑖᑦ ᐋᐱᑎᓰᐎᓂᔨᐤ ᐋ ᒌ ᐅᔮᔨᐦᑎᐦᒃ ᒑ ᐋᐦᒋᐦᑖᑦ ᑭᔮᐦ ᒫᒃ ᒑ
ᐋᑐᐙᔨᐦᑎᐦᒃ ᐋ ᐃᔑ ᓂᑎᐙᔨᐦᑎᒥᔨᒡᐦ ᑳ ᒫᒨᐱᔨᒡᐦ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ, ᔮᔨᑖ ᑯᔨᔅᒄ ᒋᑭ ᓂᔥᑐᐎᓈᐤ ᐊᓂᔮᐦ ᑳ ᒫᒨᐱᔨᒡᐦ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ᙮

9. ᑖᓂᑖᐦ ᒑ ᒌ ᐅᐦᒋ ᐙᐱᐦᑎᒫᓐ ᐋ ᐃᔑ ᐅᔮᔨᐦᑎᐦᒃ ᑳ ᐱᒥᐱᔨᐦᑖᑦ?
ᒥᓯᐙ ᐅᔮᔨᐦᑎᒧᐎᓐᐦ ᐅᐦᒋ ᐊᓂᑖᐦ ᑳ ᐱᒥᐱᔨᐦᑖᑦ ᐋᐱᑎᓰᐎᓂᔨᐤ ᑯᐯᒃ ᐄᑖᐦᒑ ᐋ ᐅᐦᒋ
ᓈᓈᑭᒋᐦᑖᑭᓂᐎᒡ ᐅᐦᒋ ᐊᓂᔮ ᐋ ᐃᔑ ᑖᐦᑭᐦᐄᒑᐱᔨᔨᒡ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐅᑖᐱᑎᓰᐎᓂᐙᐦᒡ, ᐋᐅᒄ ᒑ ᑎᐹᑐᑖᑭᓂᐎᒡ ᒥᓯᓂᐦᐄᑭᓂᐦᒡ ᐅᐦᒋ
ᐊᓂᔮᐦ ᐋ ᒌ ᐃᔑ ᐅᔮᔨᐦᑎᐦᒡ ᑭᔮᐦ ᐋᑯᑖᐦ ᒑ ᒌ ᐙᐱᐦᑖᑭᓂᐎᒡᐦ ᐊᓂᑖᐦ ᐋ ᓅᑯᐦᑖᒡ ᒑᒀᔨᐤ
MDDELCC ᓂᑑᒋᔅᒑᔨᐦᑎᒧᐙᑭᓂᐦᒡ᙮

10. ᑖᓂᑖᐦ ᒑ ᒌ ᐅᐦᒋ ᐙᐐᒋᐦᐄᐙᔮᓐ ᐋ ᐙᐙᐱᐦᑖᑭᓂᐎᒡ ᐋᐱᑎᓰᐎᓐ ᐋ ᐐᐦ
ᒋᐦᒋᐱᔨᐦᑖᑭᓂᐎᒡ?
ᒥᓯᐙ ᐹᐦᐹᔨᒄ ᐊᓂᐦᐄ ᐋᐱᑎᓰᐎᓐᐦ ᐋ ᐐᐦ ᒋᐦᒋᐱᔨᐦᑖᑭᓂᐎᒡᐦ ᐃᔑᓈᑯᓂᔨᐤ ᒑ ᐙᐙᐱᐦᑎᐦᒡ
ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᒸᐦᒡ ᐋ ᐃᔑ
ᐐᓯᓈᑖᔨᒡ ᐅᑖᐱᑎᓰᐎᓂᐙᐤ ᐆ ᐋ ᓅᑯᐦᑖᑭᓂᐎᒡ ᒑᒀᓐ ᓂᑑᒋᔅᒑᔨᐦᑎᒧᐙᑭᓂᐦᒡ᙮ ᒋᑭ ᒌ ᐊᔨᒥᐦᑖᓐ
ᒥᓯᓂᐦᐄᑭᓐᐦ ᐋ ᐊᑎ ᑖᐦᑭᐦᐄᒑᐱᔨᒡᐦ ᑭᔮᐦ ᒋᑭ ᒌ ᐹᒋ ᐃᑎᔑᐦᐊᓐ ᔥᑎᔨᒧᐎᓐ ᐅᐦᒋ ᐊᓐ ᐋ
ᐃᑖᔨᐦᑎᒥᐦᐄᑯᔨᓐ ᒑᒀᓐ ᐊᓂᑖᐦ COMEX ᒥᓯᓂᐦᐄᒑᐅᑭᒥᑯᐦᒡ᙮ ᒥᔔ ᐋ ᐱᒥᐱᔨᐦᑖᒡ ᑳ ᒫᒨᐱᒡ ᑳ
ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐋ ᓂᔥᑐᔨᔥᑖᑭᓂᐎᔨᒡ ᐹᔨᑯᔨᒡ ᐋ
ᐃᔑᓈᑯᓂᔨᒡ ᐋᐱᑎᓰᐎᓂᔨᐤ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ, ᒫᑎᔨᒡ ᒋᑭ ᒋᔅᒑᔨᐦᑖᑯᐦᑖᑭᓂᐎᐤ ᐊᓐ ᒑ
ᓂᔥᑐᔨᓈᓂᐎᒡ ᐆᑦᐦ ᓃᔥᑖᒥᐦᒡ ᐋ ᓅᑯᐦᑖᑭᓂᐎᒡ ᒑᒀᓐ ᓂᑑᒋᔅᒑᔨᐦᑎᒧᐙᑭᓂᐦᒡ᙮ ᐊᓂᐦᐄ ᐐᔓᐙᐎᓐᐦ
ᒑ ᓈᓈᑭᒋᐦᑖᑭᓂᐎᐙᑯᐱᓈ ᐊᓐ ᐋ ᐃᔑ ᐙᐐᒋᐦᐄᐙᓂᐎᒡ ᒧᔖ ᐋ ᓂᔥᑐᔨᓈᓂᐎᒡ, ᐋᑯᑦᐦ
ᒫᓯᓈᑖᒡᐦ ᐊᓂᑦᐦ ᐱᔅᑭᒋᓯᓂᐦᐄᑭᓐ ᒧᔖ ᐋ ᐙᐐᒋᐦᐄᐙᓂᐎᒡ ᑳ ᐃᒋᔥᑖᒡ᙮

11. ᔥᑎᔮᓐ-ᐋ ᑯᒀᒋᔅᒑᒧᐎᓐ ᐋᑳ ᐋᔥᒄ ᐅᐦᒋ ᓂᔥᒀᐅᔑᐦᑖᔮᐦᒡ?
ᒑ ᐹᒋ ᐃᑎᔑᐦᐊᒧᐎᔮᐦᒡ ᑯᒀᒋᔅᒑᒧᐎᓐᐦ ᑭᔮᐦ ᒫᒃ ᐋ ᐃᑖᔨᐦᑎᒥᐦᐄᑯᔨᓐ ᒑᒀᓐ᙮