ᒋᔅᒋᓂᐙᐱᐦᑏᐙᐎᓐ ᐅᐦᒋ ᐋ ᐙᐐᒋᐦᐄᐙᒡ ᒥᓯᐙ ᐄᔨᔨᐅᒡ

ᒋᔅᒋᓂᐙᐱᐦᑏᐙᐎᓐ ᐅᐦᒋ ᐋ ᐙᐐᒋᐦᐄᐙᒡ ᒥᓯᐙ ᐄᔨᔨᐅᒡ
ᒥᓯᓂᐦᐄᑭᓐ ᑳ ᐅᑎᓂᑭᓂᐎᒡ ᒋᔖᐲᓯᒽ 5, 2015 ᒫᒀᒡ 325 ᑎᐦᑣᐤ ᑳ ᓂᔥᑐᔨᒡ ᐊᓂᒌ
COMEX ᑳ ᐐᔓᐙᑎᐦᒡ ᑖᓐ ᒑ ᐃᔑ ᓈᓈᑭᒋᐦᑖᑭᓂᐎᒡ ᐊᔅᒌ᙮
ᐊᓐ ᐋ ᒫᒥᑐᓈᔨᐦᑖᑭᓂᐎᒡ ᒑ ᒌ ᐙᐐᒋᐦᐄᐙᒡ ᒥᓯᐙ ᐄᔨᔨᐅᒡ, ᐋᐅᒄ ᓂᔥᑐ ᒑᒀᓂᐦᐄ ᒋᐱᐦ
ᑭᓂᐙᐱᐦᑖᑭᓂᐎᐤᐦ: ᒋᔅᒑᔨᐦᑎᒨᐦᐄᐙᐎᓐ, ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ, ᑭᔮᐦ ᐋ
ᓂᔥᑐᔨᔥᑖᑭᓂᐎᒡ᙮

ᒋᔅᒑᔨᐦᑎᒨᐦᐄᐙᐎᓐ
ᐊᓐ ᐋ ᐅᐦᒋ ᐱᒥᐱᔨᐦᑖᑭᓂᐎᒡ ᒧᔖ ᒑ ᒌ ᐅᐦᒋ ᐙᐐᒋᐦᐄᐙᓂᐎᒡ, ᐋᐅᒄ ᓃᔥᑎᒻ ᓈᑎᐙᔨᐦᑖᑯᐦᒡ
ᑖᑭᔥ ᒑ ᒋᔅᒑᔨᐦᑎᒨᐦᐋᑭᓂᐎᒡ ᐊᐙᓂᒌ ᒑᒀᔨᐤ ᑭᔮᐦ ᒑ ᒌ ᐙᐦᒌᒡ ᐋ ᐅᐦᒋ ᒋᔅᒑᔨᐦᑎᒨᐦᐋᑭᓂᐎᒡ
ᒑᒀᔨᐤ᙮ ᐅᑖᐦ ᒫᒃ ᑳ ᐐᔓᐙᑎᐦᒡ ᑖᓐ ᒑ ᐃᔑ ᓈᓈᑭᒋᐦᑖᑭᓂᐎᒡ ᐊᔅᒌ (COMEX), ᐋᐅᒄ ᐋ
ᐃᔥᒌᔣᒥᑭᐦᒡ ᒑ ᒋᔅᒑᔨᐦᑖᑯᐦᑖᑭᓂᐎᒡ ᒥᓯᐙ ᒋᔅᒑᔨᐦᑎᒧᐎᓐ ᐅᐦᒋ ᐊᓐ ᐋ ᐃᔑ ᑖᐦᑭᐦᐄᒑᐱᔨᔨᒡ
ᐅᑖᐱᑎᓰᐎᓂᐙᐦᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ,
ᑭᔮᐦ ᐊᓂᔮ ᐋ ᐃᔑ ᐱᒥᐱᔨᐦᑖᒡ ᐅᑖᐱᑎᓰᐎᓂᐙᐤ, ᑭᔮᐦ ᐊᓂᔮ ᒋᔅᒑᔨᐦᑎᒧᐎᓂᔨᐤ ᐅᐦᒋ
ᐋᐱᑎᓰᐎᓐᐦ ᒫᒀᒡ ᐋ ᐙᐙᐱᐦᑖᑭᓂᐎᒡᐦ ᑭᔮᐦ ᒫᒃ ᔖᔥ ᐋ ᒌ ᐙᐙᐱᐦᑖᑭᓂᐎᒡᐦ᙮
ᐊᓂᑖᐦ ᐋ ᓅᑯᐦᑖᒡ ᒑᒀᔨᐤ ᓂᑑᒋᔅᒑᔨᐦᑎᒧᐙᑭᓂᐦᒡ, ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᐋᔪᐎᒄ ᐋ ᓅᑯᐦᑖᒡ ᐋᐱᑎᓰᐅᓯᓂᐦᐄᑭᓂᔨᐤ ᐅᐦᒋ ᐊᓂᔮ ᒥᓯᐙ
ᐹᐦᐹᔨᒄ ᐋᐱᑎᓰᐎᓐᐦ ᐋ ᐙᐙᐱᐦᑖᑭᓂᐎᔨᒡᐦ᙮ ᐊᓂᐦᐄ ᐹᐦᐹᔨᒄ ᐋᐱᑎᓰᐅᓯᓂᐦᐄᑭᓐᐦ, ᐋᐅᒄ ᒫᓯᓈᑖᒡ
ᐊᐙᓐ ᐊᓐ ᐋ ᐐᐦ ᒋᐦᒋᐱᔨᐦᑖᑦ ᐋᐱᑎᓰᐎᓂᔨᐤ, ᑖᓂᑦᐦ ᒑ ᐱᒥᐱᔨᐦᑖᑭᓂᐎᒡ, ᑭᔮᐦ ᐊᐱᔒᔥ ᐋ
ᑎᐹᑐᑖᒡ ᐊᓐ ᐋᐱᑎᓰᐎᓐ᙮ ᒥᓯᐙ ᒥᓯᓂᐦᐄᑭᓐᐦ ᐅᐦᒋ ᐊᓐ ᐋ ᐊᑎ ᑖᐦᑭᐦᐄᒑᐱᔨᒡ ᐱᒫᑎᓰᐎᓂᐦᒡ ᑭᔮᐦ
ᐊᔅᒌᐦᒡ ᐋ ᒌ ᐃᔑ ᓂᑑᒋᔅᒑᔨᐦᑖᑭᓂᐎᒡ ᐋ ᒌ ᐃᑎᔑᐦᐄᑭᓂᐎᒡ ᑭᔮᐦ ᒫᒃ ᐋ ᒌ ᐅᐦᒋᐱᔨᒡ ᐊᓂᑖᐦ ᑳ
ᓈᓈᑭᒋᐦᑖᒡ ᒑᒀᔨᐤ ᑯᐯᒃ ᑎᐹᔨᐦᒋᒑᓰᓈᐦᒡ ᑭᔮᐦ ᒫᒃ ᑳ ᓃᑳᓂᔥᑭᐙᒡ ᐄᔨᔨᐤᐦ/ᐄᓅᐦ, ᐋᐅᒄ ᒥᓯᐙ
ᑯᔨᔅᒄ ᐋ ᐊᑎ ᐃᒋᔥᑖᑭᓂᐎᒡ ᐅᐦᒋ ᐊᓐ ᑖᐃᔅᑉ ᑳ ᐊᑎ ᒥᓯᓂᐦᐄᑭᓂᐎᒡ᙮ ᐊᓂᑦᐦ ᑭᔮᐦ ᐋ ᓅᑯᐦᑖᒡ
ᒑᒀᔨᐤ ᓂᑑᒋᔅᒑᔨᐦᑎᒧᐙᑭᓂᐦᒡ, ᐋᐅᒄ ᐋ ᓅᑯᐦᒡ ᐊᓐ ᐋ ᐹᒋ ᓂᑎᐙᔨᐦᑖᑭᓂᐎᒡ ᒑ ᒌ
ᔖᐳᐦᑐᐙᐱᔨᐦᑖᑭᓂᐎᒡ ᒑᒀᓐ, ᐋ ᒥᓯᓂᐦᐊᒫᑐᓈᓂᐎᒡ, ᐋ ᓂᑑᒋᔅᒑᔨᐦᑖᑭᓂᐎᒡ ᑖᓐ ᒑ ᐃᔑ
ᑖᐦᑭᐦᐄᒑᐱᔨᒡ, ᒥᒄ ᐊᓐ ᒋᔅᒑᔨᐦᑎᒧᐎᓐ ᐋ ᒌ ᐹᒋ ᐃᑎᔑᐦᐊᐦᒡ ᐊᓂᒌ ᐋ ᐐᐦ ᒋᐦᒋᐱᔨᐦᑖᒡ
ᐋᐱᑎᓰᐎᓂᔨᐤ ᐅᐦᒋ ᐊᓂᔮ ᐋ ᐃᔑ ᓂᔥᒀᐅᔑᐦᐊᒡ COMEX, ᑭᔮᐦ ᐊᓐ ᑳ ᐃᔑ
ᔖᐳᐦᑐᐙᐱᔨᐦᑖᑭᓂᐎᒡ ᒑᒀᓐ᙮ ᐊᓐ ᐋ ᓅᑯᐦᑖᑭᓂᐎᒡ ᒑᒀᓐ ᓂᑑᒋᔅᒑᔨᐦᑎᒧᐙᑭᓂᐦᒡ, ᐋᐅᒄ ᑭᔮᐦ ᐋ
ᐃᐦᑎᑯᐦᒡᐦ ᒥᓯᓂᐦᐄᑭᓐᐦ ᐋ ᒌ ᒥᓯᓂᐦᐊᐦᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐱᑯᓂᒑ ᐊᓂᔮ ᓂᔥᑐᔨᐅᓯᓂᐦᐄᑭᓐᐦ, ᑎᐹᒋᒨᓯᓂᐦᐄᑭᓐ, ᑭᔮᐦ ᐋ
ᐃᔑ ᓂᑎᐙᔨᐦᑎᑭᓂᐎᒡ ᒑᒀᓐ ᐋ ᒌ ᒥᓯᓂᐦᐊᒧᐙᑭᓂᐎᑦ ᐊᓐ ᐙᒋᐦᒡ ᐊᐙᓐ ᓂᔮᓈᑭᒋᐦᑖᑦ ᒑᒀᔨᐤ᙮
ᐊᓐ ᒫᒃ ᒑ ᒌ ᐙᐦᒌᓈᓂᐎᒡ ᐋ ᓂᑑᒋᔅᒑᔨᐦᑖᑭᓂᐎᒡ ᒑᒀᓐ, ᐅᐦᐄ ᒥᓯᓂᐦᐄᑭᓐᐦ, ᐋᐅᒄ PDF ᐋ
ᐃᔑᓈᑯᐦᒡᐦ ᑭᔮᐦ ᒫᒃ ᓰᑎᐤ ᒑ ᒌ ᐅᐦᒋ ᐲᐦᑎᑖᐱᔨᓈᓂᐎᒡ ᐋ ᒌᔅᒋᓂᑭᓂᐎᒡᐦ ᐊᓐ ᐋ ᓅᑯᐦᒡ ᐊᓂᑦᐦ
ᓂᑣᐱᐦᒋᑭᓂᐦᒡ᙮
ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐹᔓᐙᔨᒫᐅᒡ ᐊᓂᔮᐦ
ᑳ ᐐᐦ ᒋᐦᒋᐱᔨᐦᑖᔨᒡᐦ ᐋᐱᑎᓰᐎᓂᔨᐤ ᐐᐱᒡ ᒑ ᒋᔅᒑᔨᐦᑎᔮᔨᒡᐦ ᒥᓯᐙ ᐊᐙᔨᐤᐦ ᑭᔮᐦ ᒑ
ᓂᑑᒋᔅᒑᔨᐦᑎᒥᔨᒡᐦ ᑖᓐ ᐋ ᐃᑖᔨᐦᑎᒥᐦᐄᑯᔨᒡᐦ ᒑᒀᔨᐤ ᑭᔮᐦ ᒑ ᒫᐅᐦᑐᓂᐦᒡ ᐅᑎᑖᔨᐦᑎᒧᐎᓂᔨᐤᐦ ᐅᐦᒋ
ᐊᓂᔮᐦ ᐃᐦᑖᐎᓐᐦ, ᐋ ᒥᐦᒑᑎᔨᒡᐦ ᐊᐙᔨᐤᐦ ᑭᔮᐦ ᐋ ᐹᐦᐹᔨᑯᔨᒡᐦ ᐊᐙᔨᐤᐦ ᐋ ᑖᐦᑭᐦᐆᑯᔨᒡᐦ᙮ ᐊᓐ ᒑ
ᐃᔑ ᒋᔅᒋᓂᐙᐱᐦᑖᑭᓂᐎᒡ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ ᒑᒀᓐ, ᐋᐅᒄ ᒑ
ᓈᓈᑭᒋᐦᑖᑭᓂᐎᒡ ᐋ ᐃᔑ ᐅᔮᔨᐦᑎᐦᒃ ᐊᓐ ᑳ ᓈᓈᑭᒋᐦᑖᑦ ᐅᐦᒋ ᐊᓂᔮ ᐋ ᒌ ᓂᑑᒋᔅᒑᔨᐦᑖᑭᓂᐎᔨᒡ
ᑖᓐ ᒑ ᐃᔑ ᑖᐦᑭᐦᐄᒑᐱᔨᔨᒡ, ᐙᔥ ᐋᔪᐎᒄ ᐅᔮ ᑳ ᐃᔑ ᓂᑎᐙᔨᐦᑎᐦᒡ ᐊᓂᒌ ᑳ ᓂᑑᒋᔅᒑᔨᐦᑎᐦᒡ ᒑ
ᐃᔑ ᑖᐦᑭᐦᐄᒑᐱᔨᔨᒡ (COMEV)᙮ ᐊᓂᒌ ᑳ ᐐᐦ ᒋᐦᒋᐱᔨᐦᑖᒡ ᐋᐱᑎᓰᐎᓂᔨᐤ, ᔮᔨᑖ ᒋᑭ
ᐃᑎᔑᐦᐊᒧᐙᐅᒡ ᐊᓂᔮᐦ ᑳ ᓈᓈᑭᒋᐦᑖᔨᒡᐦ ᒑᒀᔨᐤ ᑎᐹᒋᒨᓯᓂᐦᐄᑭᓂᔨᐤ ᐅᐦᒋ ᐊᓂᔮ ᐋ ᒌ
ᐱᒥᐱᔨᐦᑖᒡ ᐋ ᒌ ᓂᑑᒋᔅᒑᔨᐦᑎᐦᒡ ᐋ ᐃᑖᔨᐦᑎᒥᐦᐄᐙᔨᒡ ᒑᒀᔨᐤ᙮
ᐊᓂᒌ ᑳ ᐐᐦ ᒋᐦᒋᐱᔨᐦᑖᒡ ᐋᐱᑎᓰᐎᓂᔨᐤ ᔮᔨᑖ ᒋᑭ ᑭᓂᐙᐱᐦᑎᒧᒡ ᒑ ᒑᔥᑎᓈᑖᔮᔨᐦᑖᑯᓂᔨᒡ ᐊᓐ
ᒋᔅᒑᔨᐦᑎᒧᐎᓐ ᐋ ᒋᔅᒑᔨᐦᑎᔮᑭᓂᐎᒡ ᐄᔨᔨᐅᒡ/ᐄᓅᒡ ᐊᓂᑖᐦ ᐃᐦᑖᐎᓂᐦᒡ, ᐋᐅᒄ ᔮᔨᑖ ᑯᔨᔅᒄ ᒑ
ᓂᔥᑐᐦᑎᒥᐦᐄᐙᓂᐎᒡ᙮
ᐊᓂᔮᐦ ᒦᓐ ᒥᓯᓂᐦᐄᑭᓐᐦ ᐋ ᐅᔑᐦᑎᒧᐙᑭᓂᐎᒡ ᑳ ᐙᐙᐱᐦᑎᐦᒡ ᐋ ᐃᔑ ᑖᐦᑭᐦᐄᒑᐱᔨᔨᒡ ᒑᒀᔨᐤ
ᐊᔅᒌᐦᒡ, ᐋᐅᒄ ᐅᐱᔥᑎᒀᔮᐅᔨᒧᐎᓂᐦᒡ ᒑ ᐃᔑ ᒥᓯᓂᐦᐄᑭᓂᐎᔨᒡ, ᒥᒄ ᒫᒃ ᐊᓂᒌ ᑳ ᐐᐦ ᒋᐦᒋᐱᔨᐦᑖᒡ
ᐋᐱᑎᓰᐎᓂᔨᐤ ᒋᑭ ᒌ ᐃᑣᔥᑎᒫᑎᒧᒡ ᐊᓂᔮᐦ ᐱᔥᒡ ᒥᓯᓂᐦᐄᑭᓐᐦ ᑭᔮᐦ ᒫᒃ ᒥᑯᒋᒃ ᐊᐱᔒᔥ ᒑ ᒌ
ᑎᐹᑐᑖᔨᒡᐦ ᐊᓂᔮᐦ ᒥᓯᓂᐦᐄᑭᓐᐦ ᐄᔨᔨᐅᔨᒧᐎᓂᐦᒡ ᑭᔮᐦ ᒫᒃ ᐙᒥᔥᑎᑯᔒᐅᔨᒧᐎᓂᐦᒡ᙮
ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᐦᐄᐙᒡ
ᐊᓐ ᐋ ᐱᒥᐱᔨᒡ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ ᒑᒀᓐ, ᐊᓂᒌ ᑳ ᒫᒨᐱᒡ ᑳ
ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᒋᑭ ᓈᓂᑎᐙᔨᐦᑎᒧᒡ ᐋ ᐃᑖᔨᐦᑎᒥᐦᐄᐙᔨᒡ
ᒑᒀᔨᐤ ᐅᐦᒋ ᐊᓐ ᐋᐱᑎᓰᐎᓐ ᒫᒀᒡ ᐋ ᐙᐙᐱᐦᑖᑭᓂᐎᒡ᙮ ᐋᔪᐎᒄ ᑭᔮᐦ ᐋ ᐱᑯᓵᔨᐦᑎᐦᒡ ᒑ ᐹᒋ
ᐱᒋᔅᑎᓂᑭᓂᐎᔨᒡ ᐊᔨᒧᐎᓐᐦ ᐅᐦᒋ ᐊᓂᔮ ᐋ ᐃᔑ ᐱᒥᐱᔨᐦᑖᒡ ᐋᐱᑎᓰᐎᓂᔨᐤ᙮ ᒥᔔ ᑳ
ᒋᔅᒑᔨᐦᑖᑯᐦᑖᑭᓂᐎᒡ ᐋ ᐙᐙᐱᐦᑖᑭᓂᐎᒡ ᐋᐱᑎᓰᐎᓐ ᐊᓂᑖᐦ ᐋ ᓅᑯᐦᑖᒡ ᒑᒀᔨᐤ COMEX
ᓂᑑᒋᔅᒑᔨᐦᑎᒧᐙᑭᓂᐦᒡ ᑭᔮᐦ ᐊᓂᔮ ᒥᓯᐙ ᐋ ᐊᑎ ᐃᔑᓈᑯᓂᔨᒡ ᐋ ᐙᐙᐱᐦᑖᑭᓂᐎᔨᒡ, ᐊᓂᒌ
ᐊᐙᓂᒌ ᐋ ᐃᑖᔨᐦᑎᐦᒡ ᒑ ᐙᐐᒋᐦᐄᐙᒡ ᒋᑭ ᒌ ᐋᐱᒋᐦᑖᐅᒡ ᐊᓂᔮ ᐋ ᐅᐦᒋ ᓅᑯᐦᑖᑭᓂᐎᔨᒡ ᒑᒀᔨᐤ
COMEX ᓂᑑᒋᔅᒑᔨᐦᑎᒧᐙᑭᓂᐦᒡ, ᑭᔮᐦ ᐋᑯᑦᐦ ᒑ ᒌ ᐅᐦᒋ ᐱᒋᔅᑎᓂᐦᒡ ᐅᑎᔨᒧᐎᓂᐙᐤ ᑭᔮᐦ
ᐅᑎᑖᔨᐦᑎᒧᐎᓂᐙᐤ᙮ ᐋᐅᒄ ᑭᔮᐦ ᒑ ᒌ ᐃᔑ ᒥᓯᓂᐦᐄᒑᓂᐎᒡ ᐊᓂᑖᐦ COMEX ᒥᓯᓂᐦᐄᒑᐅᑭᒥᑯᐦᒡ
ᐋ ᐐᐦᑖᑭᓂᐎᒡ ᒑᒀᓐ ᐋ ᐃᑖᔨᐦᑎᒥᐦᐄᐙᒡ᙮
ᐊᓐ ᒫᒃ ᐋ ᐃᔑ ᐐᔓᑖᒡ ᒉᐃᒥᔅ ᐯᐃ ᑭᔮᐦ ᒌᐙᑎᓐ ᑯᐯᒃ ᓂᔅᑯᒧᐎᓐ (JBNQA), “ᐊᓐ
ᐄᔨᔨᐤ/ᐄᓅ ᐃᐦᑖᐎᓐ ᑭᔮᐦ ᒫᒃ ᐊᓂᐦᐄ ᐄᔨᔨᐤ/ᐄᓅ ᐃᐦᑖᐎᓐᐦ ᒋᑭ ᒌ ᒥᔪᐱᔨᐦᑖᐅᒡ ᐅᐦᒋ ᐅᒋᒫᐦᑳᓐ
ᐋᐱᑎᓰᐎᓂᐦᒡ ᑭᔮᐦ ᒫᒃ ᐊᓂᑖᐦ ᒥᓯᐦᑖ ᐋ ᐅᐦᒋ ᐊᔨᒦᔥᑎᒧᐙᑭᓂᐎᒡ, ᒋᑭ ᒌ ᒥᓯᓂᐦᐄᑭᓂᐎᔨᐤ ᐋ
ᐅᐦᒋ ᐊᔨᒦᔥᑎᒧᐙᑭᓂᐎᒡ ᐊᓂᑖᐦ ᐋ ᐃᑎᔑᐦᐄᑭᓂᐎᔨᒡ ᑳ ᒫᒨᐱᔨᒡᐦ ᑳ ᐙᐙᐱᐦᑎᒥᔨᒡᐦ ᐋ ᐐᐦ
ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ᙮” ᒀᔣᓐ ᓂᑎᐙᔨᐦᑖᑯᐦᒑ ᒑ ᓂᔥᑐᔨᔥᑖᑭᓂᐎᒡ, ᐋᐅᒄ ᒧᔖ ᒑ
ᐱᒥᐱᔨᐦᑖᑭᓂᐎᒡ ᐋ ᓂᔥᑐᔨᓈᓂᐎᒡ᙮ ᐱᔅᑭᒋᓯᓂᐦᐄᑭᓐ II ᐅᐦᒋ ᐊᓐ ᐊᔅᒌ ᐋ ᐃᔥᐱᔥ ᒥᔪᓈᑯᐦᒡ
ᐐᔓᐙᐎᓐ, ᐋᑯᑦᐦ ᓈᑎᐙᔨᐦᑖᑯᓯᑦ, “ᐊᓐ ᑎᐹᔨᐦᒋᒑᓯᐤ, ᒀᔣᓐ ᓂᑎᐙᔨᐦᑖᑯᓂᒑ, ᒑ ᒌ ᐱᒥᐱᔨᐦᑖᑦ
ᐃᔨᐦᒡ ᐋ ᐃᔑᓈᑯᓂᔨᒡ ᒧᔖ ᐋ ᓂᑑᒋᔅᒑᔨᐦᑖᑭᓂᐎᔨᒡ ᐋ ᐃᑖᔨᐦᑎᒥᐦᐄᐙᔨᒡ ᒑᒀᔨᐤ᙮”
ᒋᔥᑎᒫᐎᓐ ᐊᓂᒌ ᐋ ᐹᐦᐹᔨᑯᒡ ᐊᐙᓂᒌ, ᒫᒨ ᐋ ᐃᐦᑖᒡ ᐊᐙᓂᒌ ᑭᔮᐦ ᐃᐦᑖᐎᓐᐦ ᒑ ᐙᐐᒋᐦᐄᐙᒡ
ᐋ ᐙᐙᐱᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐅᐦᒋ ᐊᓂᔮ ᒀᔣᓐ ᒥᔥᑏᐦ ᒑ ᑖᐦᑭᐦᐄᒑᐱᔨᔨᒡ ᐱᒫᑎᓰᐎᓂᐦᒡ
ᑭᔮᐦ ᐊᔅᒌᐦᒡ᙮ ᐋᑯᑦᐦ ᐋ ᐃᔑᓈᑯᐦᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ
ᐋᐱᑎᓰᐎᓂᔨᐤ ᑯᔨᔅᒄ ᒑ ᒌ ᓂᑑᒋᔅᒑᔨᐦᑎᐦᒡ ᐊᓂᔮ ᒑᒀᔨᐤ ᐋ ᐃᔑ ᐋᐃᒫᔨᐦᑎᒥᐦᐄᑯᔨᒡᐦ ᐊᐙᔨᐤᐦ
ᐊᓂᑖᐦ ᐊᔅᒌᐦᒡ ᑭᔮᐦ ᒑ ᒌ ᒌᑰᐱᔨᐦᑖᑭᓂᐎᒡ ᐋᔮᓂᔅᒑᐤ ᒋᔅᒑᔨᐦᑎᒧᐎᓐ ᐅᐦᒋ ᐊᓂᑖᐦ ᐄᔨᔨᐤ/ᐄᓅ
ᐃᐦᑖᐎᓐᐦ ᐊᓂᔮ ᐋ ᐙᐙᐱᐦᑎᐦᒡ ᐋᐱᑎᓰᐎᓂᔨᐤ᙮
ᐋ ᓂᔥᑐᔨᔥᑖᑭᓂᐎᒡ
ᐊᓐ ᐋ ᓂᔥᑐᔨᓈᓂᐎᒡ, ᐋᐅᒄ ᐋ ᐃᔑᓈᑯᐦᒡ ᐋ ᒋᔅᒑᔨᐦᑎᒨᐦᐄᐙᓂᐎᒡ ᑭᔮᐦ ᐋ ᓂᑑᒋᔅᒑᔨᐦᑖᑭᓂᐎᒡ
ᐋ ᐃᑖᔨᐦᑎᒥᐦᐄᐙᒡ ᒑᒀᓐ, ᐋᑯᑖᐦ ᐹᒥᐱᔨᐦᑖᑭᓂᐎᒡ ᐃᐦᑖᐎᓂᐦᒡ ᑭᔮᐦ ᒋᑭ ᐅᔮᔨᐦᑖᑭᓂᐎᐤ ᑖᐃᔅᑉ ᒑ
ᐱᒥᐱᔨᒡ, ᒋᑭ ᒫᐅᐦᑐᓂᑭᓂᐎᐤ ᐋ ᐊᑎ ᐃᓈᓂᐎᒡ ᑭᔮᐦ ᐋ ᐊᑎ ᐃᑖᔨᐦᑎᒥᐦᐄᐙᒡ ᐊᓐ ᐋᐱᑎᓰᐎᓐ
ᐋ ᐐᐦ ᒋᐦᒋᐱᔨᐦᑖᑭᓂᐎᒡ ᑭᔮᐦ ᒫᒃ ᒑᒀᓐ ᐃᔨᐦᒡ ᒑ ᐃᔑᓈᑯᐦᑖᑭᓂᐎᒡ ᐊᓂᑦᐦ ᐋᐱᑎᓰᐎᓂᐦᒡ᙮ ᐋᐅᒄ
ᒑ ᐃᔑ ᐱᒥᐱᔨᒡ ᐋ ᐊᔨᒥᐦᐄᑐᒡ ᐊᓂᒌ ᒥᓯᐙ ᐄᔨᔨᐅᒡ, ᑭᔮᐦ ᑳ ᐐᐦ ᒋᐦᒋᐱᔨᐦᑖᒡ ᐋᐱᑎᓰᐎᓂᔨᐤ,
ᑭᔮᐦ ᑳ ᐊᔥᑎᐱᒡ ᐊᓂᑦᐦ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ᙮ ᒥᓯᐙ ᒧᔖ
ᒋᑭ ᐱᒥᐱᔨᐦᑖᑭᓂᐎᐤᐦ ᐊᓂᔮ ᐋ ᐃᔑ ᐱᒥᐱᔨᐦᑖᒡ ᐋ ᓂᔥᑐᔨᓈᓂᐎᔨᒡ ᐊᓂᒌ ᑳ ᐙᐙᐱᐦᑎᐦᒡ ᐋ
ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ᙮

ᐋ ᐅᑖᔨᐦᑖᑭᓂᐎᒡ ᑖᓐ ᐋ ᐃᔑ ᓂᑎᐙᔨᐦᑖᑯᐦᒡ ᐋ ᓂᔥᑐᔨᔥᑖᑭᓂᐎᒡ
ᐊᓂᒌ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᒋᑭ ᐅᔮᔨᐦᑎᒧᒡ ᐋ
ᓂᑎᐙᔨᐦᑖᑯᓂᔨᒡ ᐋ ᓂᔥᑐᔨᓈᓂᐎᔨᒡ ᒥᔔ ᑳ ᐙᐙᐱᐦᑎᐦᒡ ᐊᓂᔮ ᑖᓐ ᒑ ᐃᔑ ᑖᐦᑭᐦᐄᒑᐱᔨᔨᒡ
ᐱᒫᑎᓰᐎᓂᐦᒡ ᑭᔮᐦ ᐊᔅᒌᐦᒡ ᐊᓂᔮ ᐋᐱᑎᓰᐎᓂᔨᐤ, ᐊᓂᔮ ᐋ ᐃᔑ ᒋᐦᒋᐱᔨᐦᑖᔨᒡᐦ ᐊᐙᔨᐤᐦ ᒑᒀᔨᐤ,
ᑭᔮᐦ ᐊᓐ ᐋ ᐃᔑ ᐐᐦᑖᑭᓂᐎᒡ ᒑᒀᓐ ᒫᒀᒡ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ ᒑᒀᓐ᙮
30 ᑎᐦᑐ ᒌᔑᑳᐤᐦ ᒋᑭ ᐐᐦᑖᑭᓂᐎᐤ ᐊᓐ ᒑ ᓂᔥᑐᔨᓈᓂᐎᒡ ᒥᔔ ᑳ ᐅᔮᔨᐦᑎᐦᒡ ᐊᓂᒌ ᑳ
ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᐋᒄ ᒫᒃ ᒑ ᒑᔥᑎᓈᑖᔮᔨᐦᑖᑯᐦᒡ ᐊᓐ
ᒋᔅᒑᔨᐦᑎᒧᐎᓐ ᐅᐦᒋ ᐊᓐ ᒥᓯᐙ ᐋ ᐊᑎ ᐃᔑᓈᑯᐦᒡ ᐊᓐ ᐋᐱᑎᓰᐎᓐ᙮

ᐋ ᐅᔮᔨᐦᑖᑭᓂᐎᒡ ᑖᓂᑦᐦ ᑭᔮᐦ ᑖᐃᔅᑉ
ᐊᓂᒌ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᒋᑭ ᐅᔮᔨᐦᑎᒧᒡ ᑖᓂᑦᐦ ᒑ
ᓂᔥᑐᔨᓈᓂᐎᔨᒡ ᑭᔮᐦ ᑖᐃᔅᑉ ᐋᒄ ᒫᒃ ᒑ ᒌ ᓂᐦᐄᔥᑳᑯᒡ ᐊᓂᒌ ᐙᒋᐦᐄᐙᒡ᙮ ᐊᓐ ᐋ
ᐅᐙᔮᐱᐦᑖᑭᓂᐎᒡ ᐋ ᓂᔥᑐᔨᓈᓂᐎᒡ, ᐋᐅᒄ ᑭᔮᐦ ᒑ ᐐᒋᐦᐄᐙᒡ ᐊᓂᒌ ᐃᐦᑖᐎᓂᔨᐤ ᑳ ᓃᑳᓂᔥᑭᐦᒡᑭᔮᐦ ᑳ ᓃᑳᓂᔥᑭᐦᒡ ᐊᓂᔮ ᒥᓯᐦᑖ ᐋ ᑭᓂᐙᐱᐦᑖᑭᓂᐎᔨᒡ᙮ 30 ᑎᐦᑐ ᒌᔑᑳᐤᐦ ᒋᑭ ᓂᑎᐙᔨᐦᑖᑯᓐ ᒑ
ᐃᔥᐱᔥ ᒋᔅᒑᔨᐦᑖᑯᐦᑖᑭᓂᐎᒡ ᐋᐦᒸᔮ ᐊᓐ ᐋ ᓂᔥᑐᔨᓈᓂᐎᒡ᙮
ᐊᓐ ᐋ ᓂᔥᑐᔨᓈᓂᐎᒡ, ᐋᐅᒄ ᔮᔨᑖ ᒑ ᐃᔑᓈᑯᐦᒡ ᒑ ᒌ ᐙᐦᒌᑯᒡ ᐊᓂᒌ ᐊᐙᓂᒌ ᑎᔮᐦᑭᐦᐆᑯᒡ ᐋ
ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐊᓂᔮ ᐋ ᐋᔨᒧᑖᑭᓂᐎᔨᒡ ᒑᒀᔨᐤ᙮ ᒥᒄ ᒫᒃ ᒀᔣᓐ ᐃᔨᐦᒡ
ᐃᔑ ᓂᑎᐙᔨᐦᑖᑭᓂᐎᒑ, ᐊᓂᒌ ᑳ ᐙᐐᒋᐦᐄᐙᒡ ᒋᑭ ᑎᐱᐦᐊᒧᒡ ᐊᓂᔮ ᐋ ᐃᔑ ᐙᐐᒋᐦᐄᐙᒡ ᐋ
ᓂᔥᑐᔨᓈᓂᐎᔨᒡ᙮

ᒧᔖ ᐋ ᐹᐦᑖᑯᐦᑖᑭᓂᐎᒡ ᒑ ᓂᔥᑐᔨᓈᓂᐎᒡ
ᐊᓐ ᒧᔖ ᐋ ᐹᐦᑖᑯᐦᑖᑭᓂᐎᒡ ᒑ ᓂᔥᑐᔨᓈᓂᐎᒡ, ᐋᑯᑦᐦ ᒑ ᐅᐦᒋ ᐐᐦᑖᑯᐦᒡ ᑎᐹᒋᒨᓯᓂᐦᐄᑭᓐ ᐋ
ᓅᑯᐦᑖᑭᓂᐎᒡ, ᐋᐅᒄ ᒑ ᐃᑎᔑᐦᐄᑭᓂᐎᒡ ᐊᓂᑖᐦ ᐃᐦᑖᐎᓂᐦᒡ ᐋ ᐅᐦᒋ ᐱᒥᐱᔨᐦᑖᑭᓂᐎᒡ ᑎᐹᒋᒨ
ᐋᐱᑎᓰᐎᓐ ᑭᔮᐦ ᒥᓯᐦᑖ ᐋ ᐅᐦᒋ ᒋᔅᒑᔨᐦᑖᑯᐦᑖᑭᓂᐎᒡ ᒑᒀᓐ ᑎᐹᒋᒨ ᐋᐱᑎᓰᐎᓂᐦᒡ᙮ ᐋᑯᑦᐦ ᑭᔮᐦ ᒑ
ᐅᐦᒋ ᒋᔅᒑᔨᐦᑖᑯᐦᑖᑭᓂᐎᒡ ᐊᓂᑖᐦ ᓂᑑᒋᔅᒑᔨᐦᑎᒧᐙᑭᓂᐦᒡ ᐋ ᐅᐦᒋ ᓅᑯᐦᑖᒡ ᒑᒀᔨᐤ ᑳ ᐙᐙᐱᐦᑎᐦᒡ ᐋ
ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᑭᔮᐦ ᐊᓂᑦᐦ ᐋ ᐅᐦᒋ ᐅᑑᑖᒥᒥᑐᓈᓂᐎᒡ
ᓂᑑᒋᔅᒑᔨᐦᑎᒧᐙᑭᓂᐦᒡ᙮
ᐊᓐ ᐋ ᒋᔅᒑᔨᐦᑖᑯᐦᑖᑭᓂᐎᒡ, ᐋᐅᒄ ᒑ ᐐᐦᑖᑯᐦᒡ ᑖᐃᔅᑉ, ᑖᓂᑦᐦ ᑭᔮᐦ ᑖᓐ ᐋ ᐃᔥᐱᔑᐱᔨᒡ ᒑ
ᓂᔥᑐᔨᓈᓂᐎᒡ᙮ ᐋᐅᒄ ᑭᔮᐦ ᒑ ᐐᐦᑖᑯᐦᒡ ᓂᓈᐦᑰ ᒑ ᒌ ᐃᐦᑎᓈᓂᐎᒡ ᐋ ᐙᐐᒋᐦᐄᐙᓂᐎᒡ ᐋ
ᓂᔥᑐᔨᓈᓂᐎᒡ᙮ ᐋᐅᒄ ᐋ ᐃᐦᑎᑯᐦᒡ ᒑ ᒌ ᐅᐦᒋ ᐲᐦᑎᑖᐱᔨᓈᓂᐎᒡ ᐊᑎᑑ ᒥᒋᓐ ᒑ ᒌ ᐅᐦᒋ
ᒋᔅᒑᔨᐦᑖᑭᓂᐎᒡᐊᓐ ᐋᐱᑎᓰᐎᓐ ᐊᓂᑖᐦ ᐋ ᓅᑯᐦᑖᒡ ᒑᒀᔨᐤ COMEX ᓂᑑᒋᔅᒑᔨᐦᑎᒧᐙᑭᓂᐦᒡ
ᐅᐱᔥᑎᒀᔮᐅᔨᒧᐎᓂᐦᒡ ᒋᑭ ᐐᐦᑖᑭᓂᐎᐤ, ᑭᔮᐦ ᒫᒃ ᒀᔣᓐ ᓂᑎᐙᔨᐦᑖᑯᐦᒑ, ᒦᓐ ᑯᑎᒃ ᐊᔨᒧᐎᓐ ᑭᔮᐦ
ᒫᒃ ᑯᑎᒃᐦ ᐊᔨᒧᐎᓐᐦ ᒋᑭ ᐋᐱᒋᐦᑖᑭᓂᐎᐤᐦ ᐊᓂᑖᐦ ᐃᐦᑖᐎᓂᐦᒡ ᐋ ᐃᔑ ᐃᔮᐱᒋᐦᑖᑭᓂᐎᒡᐦ᙮

ᐋ ᐹᒋ ᐱᒋᔅᑎᓂᑭᓂᐎᒡ ᒑᒀᓐ
ᒥᒄ ᐊᓂᒌ ᐊᐙᓂᒌ ᐋ ᒥᐦᒑᑎᒡ ᑭᔮᐦ ᒫᒃ ᐋ ᐹᐦᐹᔨᑯᒡ ᒋᑭ ᒌ ᐱᒋᔅᑎᓂᒧᒡ ᒑᒀᔨᐤ ᐊᓂᔮ ᒧᔖ ᐋ
ᓂᔥᑐᔨᓈᓂᐎᔨᒡ ᐅᐦᒋ ᐊᓂᔮ ᐋ ᐃᑎᔑᐦᐊᒧᐙᒡ ᑳ ᒥᓯᓂᐦᐄᒑᐱᔨᐦᑖᔨᒡᐦ ᐊᓂᑖᐦ ᑳ ᐙᐙᐱᐦᑎᒥᔨᒡᐦ
ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᐋᐦᒸᔮ ᐊᓂᔮ ᐋ ᓂᔥᑐᔨᓈᓂᐎᔨᒡ; ᒀᔣᓐ
ᓂᑎᐙᔨᐦᑎᐦᒀᐙ, ᐊᐱᔒᔥ ᒋᑭ ᒌ ᐊᔨᒥᓈᓂᐎᐤ ᐋ ᐋᔨᒧᑖᑭᓂᐎᒡ ᐊᓐ ᒑᒀᓐ ᐹᒋᔅᑎᓂᑭᓂᐎᒡ᙮ ᒥᒄ
ᒫᒃ ᓂᒧᔨ ᔮᔨᑖ ᓂᑎᐙᔨᐦᑖᑯᓐ ᒑ ᐱᒋᔅᑎᓂᑭᓂᐎᒡ ᒥᓯᓂᐦᐄᑭᓐ ᒑ ᒌ ᐐᒋᐦᐄᐙᓂᐎᒡ ᒧᔖ ᐋ
ᓂᔥᑐᔨᓈᓂᐎᒡ᙮

ᐋ ᐙᐐᒋᐦᐄᐙᓂᐎᒡ ᐋ ᓂᔥᑐᔨᓈᓂᐎᒡ
ᐊᓐ ᒧᔖ ᐋ ᓂᔥᑐᔨᓈᓂᐎᒡ, ᐋᐅᒄ ᐋ ᐋᐱᐦᐋᒧᐙᑭᓂᐎᒡ ᐊᐙᓂᒌ ᐋ ᐹᐦᐹᔨᑯᒡ ᑭᔮᐦ ᒫᒃ ᒫᒨ ᐋ
ᐃᐦᑖᒡ ᐊᐙᓂᒌ ᐋ ᐐᐦ ᐐᐦᑎᐦᒡ ᐅᑎᑖᔨᐦᑎᒧᐎᓂᐙᐤ, ᒑ ᒌ ᐱᒋᔅᑎᓂᐦᒡ ᐅᑎᔨᒧᐎᓂᐙᐤ ᒑ ᒌ
ᐃᐦᑎᓈᓂᐎᔨᑯᐱᓈ ᐋᐱᑎᓰᐎᓂᐦᒡ ᒫᒀᒡ ᐋ ᑭᓂᐙᐱᐦᑖᑭᓂᐎᔨᒡ, ᑭᔮᐦ ᒫᒃ ᒑ ᒌ ᐱᒋᔅᑎᓂᐦᒡ ᒑᒀᔨᐤ
ᒑ ᐙᐙᐱᐦᑖᑭᓂᐎᔨᒡ᙮ ᒨᔥ ᐋᐱᐦᐋᒧᐙᑭᓂᐎᐎᒡ ᐊᐙᓂᒌ ᒑ ᒌ ᐹᒋ ᑭᓂᐙᐱᒡ᙮ ᐊᓐ ᐊᐙᓐ ᐋᐃᑖᔨᐦᑎᐦᒃ ᒑ ᒌ ᐱᒋᔅᑎᓂᐦᒃ ᑎᐲᐙ ᐅᑎᑖᔨᐦᑎᒧᐎᓐ ᑭᔮᐦ ᒫᒃ ᐅᑎᑖᔨᐦᑎᒧᐎᓂᐙᐤ ᐋ
ᐊᔨᒦᔥᑎᒧᐙᑦ ᐊᐙᔨᐤᐦ, ᓂᑎᐙᔨᐦᑖᑯᓯᐤ ᒑ ᐲᐦᑎᑖᓯᓂᐦᐆᓱᑦ ᐊᓂᑖᐦ ᑳ ᒥᓯᓂᐦᐄᒑᐱᔨᐦᑖᔨᒡᐦ ᐋ
ᐃᐦᑖᔨᒡᐦ ᐋᐦᒸᔮ ᒋᐦᒋᐱᔨᐦᑖᑭᓂᐎᔨᒡ ᐊᓂᔮ ᐋ ᓂᑑᒋᔅᒑᔨᐦᑖᑭᓂᐎᔨᒡ ᐋ ᐃᑖᔨᐦᑎᒥᐦᐄᐙᔨᒡ ᒑᒀᔨᐤ
ᑭᔮᐦ ᒫᒃ ᐋᐦᒸᔮ ᐋ ᒋᐦᒋᑖᑭᓂᐎᔨᒡ ᐋ ᓂᔥᑐᔨᓈᓂᐎᔨᒡ᙮ ᐊᓐ ᐋ ᐱᒋᔅᑎᓂᑭᓂᐎᒡ ᐊᔨᒧᐎᓐ, ᐋᐅᒄ
ᒑ ᒌ ᐊᔨᒥᓈᓂᐎᒡ ᑭᔮᐦ ᒫᒃ ᒑ ᒌ ᒥᓯᓂᐦᐄᒑᓂᐎᒡ᙮ ᐊᓐ ᒥᓯᐙ ᒑᒀᓐ ᐋ ᐹᒋ ᐱᒋᔅᑎᓂᑭᓂᐎᒡ ᑭᔮᐦ
ᐊᓐ ᒥᓯᐙ ᐊᔨᒧᐎᓐ ᐋ ᐱᒋᔅᑎᓂᑭᓂᐎᒡ, ᐋᐅᒄ ᒧᔖ ᒋᔅᒑᔨᐦᑎᒨᐦᐄᐙᐎᓐ ᐋ ᐃᑎᒋᐦᑎᑭᓂᐎᒡ᙮
ᐊᓂᒌ ᐊᐙᓂᒌ ᐋ ᐹᐦᐹᔨᑯᒡ ᒋᑭ ᒌ ᐱᒋᔅᑎᓂᒧᒡ ᐅᑎᑖᔨᐦᑎᒧᐎᓂᐙᐤ ᐋ ᒌ ᒥᓯᓂᐦᐊᐦᒡ ᒑ ᒌ
ᐙᐱᐦᑎᒥᔨᒡᐦ ᑳ ᒫᒨᐱᔨᒡᐦ ᑳ ᐙᐙᐱᐦᑎᒥᔨᒡ ᒑᒀᔨᐤ ᐋᑦ ᐊᔮᐱᒡ ᐋᑳ ᐐᒋᐦᐄᐙᒡ ᐊᓂᔮ ᐋ
ᓂᔥᑐᔨᓈᓂᐎᔨᒡ ᐅᐦᒋ ᐊᓂᔮ ᐋ ᒌ ᒥᓯᓂᐦᐄᒑᒡ ᑭᔮᐦ ᒫᒃ ᓂᑣᐱᐦᒋᑭᓂᐦᒡ ᐋ ᐅᐦᒋ
ᒥᓯᓂᐦᐊᒫᑐᓈᓂᐎᒡ ᒥᑯᒋᒃ 30 ᑎᐦᑐ ᒌᔑᑳᐤᐦ ᑳ ᒌᔑᐱᔨᔨᒡ ᐊᓂᔮ ᒧᔖ ᑳ ᓂᔥᑐᔨᓈᓂᐎᔨᒡ᙮
ᐊᓐ ᒫᒃ ᒑ ᒌ ᓂᐦᐄᐱᔨᒡ ᒥᐦᒑᑐ ᐊᐙᓂᒌ ᒑ ᒌ ᐙᐐᒋᐦᐄᐙᒡ, ᐋᔪᐎᒄ ᐋ ᐃᑖᑭᓂᐎᒡ ᐊᓂᒌ ᑳ
ᐙᐐᒋᐦᐄᐙᒡ ᑯᔨᔅᒄ ᒑ ᐙᐐᐦᑎᐦᒡ ᒑᒀᔨᐤ᙮ ᒥᒄ ᒫᒃ ᐊᔮᐱᒡ ᒋᑭ ᒌ ᐲᐦᑎᑖᓯᓂᐦᐆᓲ ᐊᐙᓐ ᒦᓐ ᐐᐦ
ᐐᐦᑎᐦᑳ ᒑᒀᔨᐤ᙮

ᐋ ᐃᐦᑎᓈᓂᐎᒡ ᐋ ᓂᔥᑐᔨᓈᓂᐎᒡ
ᐊᓂᒌ ᑳ ᐐᒋᐦᐄᐙᒡ ᐋ ᓂᔥᑐᔨᓈᓂᐎᔨᒡ ᒋᑭ ᒌ ᐋᐱᒋᐦᑖᐅᒡ ᐊᓂᔮ ᐊᔨᒧᐎᓂᔨᐤ ᐋ ᐐᐦ
ᐋᐱᒋᐦᑖᒡ᙮ ᒋᑭ ᒌ ᐃᐦᑎᑯᓐ ᑭᔮᐦ ᐋ ᐃᑣᔥᑎᒫᒑᓂᐎᒡ ᒫᒀᒡ ᐋ ᐊᔨᒥᓈᓂᐎᒡ ᒀᔣᓐ ᓂᑎᐙᔨᐦᑖᑯᐦᒑ᙮
ᐊᓐ ᐅᒋᒫᐤ ᐊᓂᑦᐦ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᒋᑭ
ᑎᐹᔨᐦᑎᒽ ᐋ ᓂᔥᑐᔨᓈᓂᐎᒡ ᑭᔮᐦ ᒋᑭ ᒑᔥᑎᓈᔮᔨᐦᑖᑯᐦᑖᐤ ᔮᔨᑖ ᒑ ᓂᐦᐄᐱᔨᔨᒡ ᑭᔮᐦ ᑯᔨᔅᒄ ᒑ ᒌ
ᐱᒥᐱᔨᔨᒡ᙮ ᐊᓐ ᐅᒋᒫᐤ ᓃᔥᑎᒻ ᒋᑭ ᐙᐐᐦᑎᒽ ᒑᒀᔨᐤ ᐅᐦᒋ ᐊᓂᔮ ᐋ ᒋᔅᒑᔨᐦᑖᑯᐦᑖᑦ ᐅᔮ:
• ᒑ ᐃᔑᓈᑯᐦᒡ ᐐᔓᐙᐎᓐᐦ ᐋ ᑭᓂᐙᐱᐦᑖᑭᓂᐎᒡᐦ ᑭᔮᐦ ᐊᓐ ᒑ ᐃᔑ ᐱᒥᐱᔨᔨᒡ
ᐅᑖᐱᑎᓰᐎᓂᐙᐤ ᐊᓂᒌ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ
ᑭᔮᐦ ᐊᓂᒌ ᑳ ᐊᔥᑎᐱᒡ;
• ᐊᓐ ᐋᐱᑎᓰᐎᓐ ᑭᔮᐦ ᐋ ᐃᔑ ᐱᒥᐱᔨᒡ ᐋ ᐙᐙᐱᐦᑖᑭᓂᐎᒡ ᒑᒀᓐ ᔖᔥ ᐋ ᒌ
ᒌᔥᑖᑭᓂᐎᒡ;
• ᐋ ᐃᐦᑎᓈᓂᐎᒡ ᐋ ᐱᒥᐱᔨᐦᑖᑭᓂᐎᒡ ᒋᔅᒑᔨᐦᑎᒨᐦᐄᐙᐎᓐ ᑭᔮᐦ ᐋ
ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ;
• ᐋ ᓂᑎᐙᔨᐦᑖᑯᐦᒡ ᐋ ᐲᐦᑎᑖᓯᓂᐦᐆᓱᓈᓂᐎᒡ ᒑ ᒌ ᐱᒋᔅᑎᓂᐦᒃ ᐊᐙᓐ ᐅᑎᔨᒧᐎᓐ;
• ᒥᒄ ᐊᓐ ᒑᒀᓐ ᐋ ᒌᐦᑳᔮᔨᐦᑖᑯᐦᒡ ᒑ ᓈᓈᑭᒋᐦᑖᑭᓂᐎᑯᐱᓈ ᒑ ᒋᔅᒌᐦᑖᑭᓂᐎᒡ᙮
ᐊᓐ ᒧᔖ ᐋ ᓂᔥᑐᔨᓈᓂᐎᒡ, ᐋᐅᒄ ᓃᔓᔨᒡ ᐋ ᐃᔑᓈᑯᐦᒡ ᐋ ᐃᔑ ᐱᒥᐱᔨᐦᑖᑭᓂᐎᒡ᙮
ᐊᓐ ᓃᔥᑎᒻ, ᐊᓐ ᑳ ᐱᒋᔅᑎᓂᐦᒃ ᒑᒀᔨᐤ ᒋᑭ ᐐᐦᑎᒽ ᐊᓂᔮ ᐋ ᐃᔑᓈᑯᓂᔨᒡ ᐋᐱᑎᓰᐎᓂᔨᐤ ᐋ
ᐐᐦ ᒋᐦᒋᐱᔨᐦᑖᑭᓂᐎᔨᒡ ᑭᔮᐦ ᐊᓐ ᐋ ᐃᔑ ᐹᔓᐙᔨᐦᑖᑯᐦᒡ ᒑ ᐃᔑ ᑖᐦᑭᐦᐄᒑᐱᔨᒡ ᐱᒫᑎᓰᐎᓂᐦᒡ ᑭᔮᐦ
ᐊᔅᒌᐦᒡ, ᑖᐱᔥᑯᓐ ᐋ ᐃᔑ ᐐᒋᐦᐄᐙᐱᔨᒡ ᑭᔮᐦ ᐋ ᐃᔑ ᒥᒋᐱᔨᐦᐄᐙᒡ᙮ ᐋ ᑭᓂᐙᐱᐦᑖᑭᓂᐎᒡ ᐊᓐ
ᐋ ᐃᔥᐱᔥ ᑯᔨᔅᒄ ᒋᔅᒑᔨᐦᑖᑯᐦᑖᑦ ᒑᒀᔨᐤ ᐊᓐ ᑳ ᐱᒋᔅᑎᓂᐦᒡ ᒑᒀᔨᐤ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ,
ᐋᑯᑦᐦ ᑭᔮᐦ ᒌᑰ ᒑ ᒌ ᐱᒥᐱᔨᐦᑖᑭᓂᐎᒡ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ᙮ ᐆ ᒫᒃ ᐋ
ᐃᔥᐱᔥ ᐱᒥᐱᔨᒡ, ᐋᐅᒄ ᒑ ᐃᔥᐱᔥ ᐱᒥᐱᔨᒡ ᐅᐦᒋ ᐊᓐ ᑖᓐ ᐃᔥᐱᔥ ᑯᔨᔅᒄ ᓂᔥᑐᐦᑎᐦᒡ ᐊᓂᒌ ᑳ
ᐐᒋᐦᐄᐙᒡ ᐋ ᓂᔥᑐᔨᓈᓂᐎᔨᒡ ᐊᓂᔮ ᒑᒀᔨᐤ ᐋ ᒋᔅᒑᔨᐦᑖᑯᐦᑖᑭᓂᐎᔨᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ᙮ᒥᔔ ᐋ ᒌᔥᑖᑦ ᐊᓐ ᑳ ᐙᐱᐦᑏᐙᑦ ᐋ ᐐᐦ ᒋᐦᒋᐱᔨᐦᑖᑦ ᐋᐱᑎᓰᐎᓂᔨᐤ, ᐊᓂᒌ ᑳ ᒫᒨᐱᒡ ᑳ
ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ ᑭᔮᐦ ᐊᓂᒌ ᑳ ᐐᒋᐦᐄᐙᒡ ᐋ
ᓂᔥᑐᔨᓈᓂᐎᒡ ᒋᑭ ᒌ ᑯᒀᒋᔅᒑᒨᒡ ᒑᒀᔨᐤ᙮ ᐅᐦᐄ ᑯᒀᒋᔅᒑᒧᐎᓐᐦ, ᐋᐅᒄ ᒑ ᑯᒀᒋᒫᑭᓂᐎᑦ ᐊᓐ ᐅᒋᒫᐤ
ᐊᓂᑦᐦ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᐋᐱᑎᓰᐎᓂᔨᐤ, ᑭᔮᐦ ᐋᐅᒄ ᐐᔨ ᒑ
ᐋᔔᒥᔮᑦ ᐊᓂᔮᐦ ᐙᒋᐦᒡ ᑯᔨᔅᒄ ᒑ ᒌ ᓂᔥᒀᐅᔑᐦᑖᔨᒡᐦ᙮
ᒥᔔ ᑳ ᒌᔑᐱᔨᒡ ᐆ ᓃᔥᑎᒻ ᐋ ᐃᔑ ᐱᒥᐱᔨᐦᑖᑭᓂᐎᒡ, ᐙᐃᐱᔥᒌᔥ ᒋᑭ ᒋᐱᐦᒋᓂᒽ ᐊᓐ ᐅᒋᒫᐤ ᐋ
ᓂᔥᑐᔨᓈᓂᐎᔨᒡ ᐋᐦᒸᔮ ᐋ ᐋᐱᐦᐋᒃ ᐋ ᓂᑑᒋᔅᒑᔨᐦᑖᑭᓂᐎᔨᒡ ᐋ ᐃᑖᔨᐦᑎᒥᐦᐄᐙᔨᒡ ᒑᒀᔨᐤ᙮ ᒥᔔ
ᐋ ᐅᑎᐦᒋᐱᔨᒡ, ᐊᓂᒌ ᑳ ᐙᐐᒋᐦᐄᐙᒡ ᐋ ᐐᐦ ᐱᒋᔅᑎᓂᐦᒡ ᐅᑎᑖᔨᐦᑎᒧᐎᓂᐙᐤ ᑭᔮᐦ ᒫᒃ ᐋ ᐐᐦ
ᐱᒋᔅᑎᓂᐦᒡ ᑖᓂᑖᐦ ᒑ ᐃᐦᑎᓈᓂᐎᔨᑯᐱᓈ ᒑ ᒌ ᐹᐦᑎᒥᔨᒡᐦ ᐊᓂᔮᐦ ᑳ ᒫᒨᐱᔨᒡᐦ ᐋ ᐙᐙᐱᐦᑎᒥᔨᒡ
ᒑᒀᔨᐤ, ᐋᑯᑦᐦ ᐋ ᐱᒋᔅᑎᓂᒧᐙᑭᓂᐎᒡ ᒑ ᒌ ᒥᓯᓂᐦᐆᑯᒡ ᐊᓂᔮᐦ COMEX ᑳ ᒥᓯᓂᐦᐄᒑᐱᔨᐦᑖᔨᒡᐦ,
ᒀᔣᓐ ᐋᑳ ᐋᔥᒄ ᐅᐦᒋ ᐃᐦᑎᐙᑯᐱᓈ᙮
ᒦᔔ ᓃᔣᐤ ᐱᒥᐱᔨᒑ ᐋ ᓂᔥᑐᔨᓈᓂᐎᒡ, ᐊᓐ ᐅᒋᒫᐤ ᒋᑭ ᓂᑐᒫᐤ ᑳ ᐐᒋᐦᐄᐙᔨᒡᐦ ᒑ
ᐱᒋᔅᑎᓂᒥᔨᒡᐦ ᒑᒀᔨᐤ ᒑ ᐋᔨᒧᑖᑭᓂᐎᔨᒡ ᑭᔮᐦ ᒫᐤ ᒑ ᐃᔑ ᓈᓈᑭᒋᐦᑖᑭᓂᐎᒡ:
• ᐋ ᐊᔨᒦᔥᑎᒥᐙᒡ ᐄᔨᔨᐤᐦ ᑭᔮᐦ ᒫᒃ ᐃᐦᑖᐎᓐᐦ ᐋ ᐅᐦᒋ ᐱᒥᐱᔨᐦᑖᑭᓂᐎᒡᐦ;
• ᒧᔖ ᐋ ᒫᒨᐱᓈᓂᐎᒡ, ᐋ ᐅᐦᒋ ᐱᒥᐱᔨᐦᑖᑭᓂᐎᒡ ᒑᒀᓐ ᑭᔮᐦ ᐋᐱᑎᓰᐎᓐᐦ;
• ᐋ ᐹᐦᐹᔨᑯᒡ ᐊᐙᓂᒌ᙮
ᐊᓐ ᐋ ᐊᔨᒥᓈᓂᐎᒡ, ᐋᐅᒄ ᐅᒋᒫᐤ ᒑ ᐊᔨᒥᐦᐋᑭᓂᐎᑦ, ᐙᔥ ᐋᐅᒄ ᒑ ᓈᓈᑭᒋᐦᑖᑦ ᐊᓂᔮ ᑯᔨᔅᒄ ᒑ
ᓂᔥᒀᐅᔑᐦᐋᑭᓂᐎᔨᒡᐦ ᐊᓂᔮᐦ ᑳ ᐹᒋ ᐱᒋᔅᑎᓂᒥᔨᒡ ᒑᒀᔨᐤ ᑭᔮᐦ ᒫᒃ ᐊᑎᑑ ᐋ ᓂᔥᑐᐦᑖᑯᐦᑖᑭᓂᐎᔨᒡ
ᒑᒀᔨᐤ᙮
ᐊᓐ ᐋ ᒌ ᐅᑎᓂᐦᐄᑭᓂᐎᒡ ᐋ ᐹᐦᑖᑯᐦᒡ ᐋ ᒌ ᓂᔥᑐᔨᓈᓂᐎᒡ ᒋᑭ ᐃᐦᑎᑯᓐ ᐊᓂᑦᐦ ᐋ ᓅᑯᐦᑖᒡ
ᒑᒀᔨᐤ COMEX ᐊᓂᑖᐦ ᓂᑑᒋᔅᒑᔨᐦᑎᒧᐙᑭᓂᐎᒡ ᐐᐱᒡ ᐋ ᐃᔥᐱᔥ ᓂᐦᐄᐱᔨᔨᒡ᙮

ᑎᐹᒋᒨᓯᓂᐦᐄᑭᓐ ᐋ ᓂᑑᒋᔅᒑᔨᐦᑖᑭᓂᐎᒡ ᐋ ᐃᔅᐱᔨᒡ
ᐊᓂᒌ ᑳ ᒫᒨᐱᔥᑎᐦᒡ ᐋ ᐙᐙᐱᐦᑎᐦᒡ ᐋ ᐃᔅᐱᔨᔨᒡ ᒑᒀᔨᐤ ᒋᑭ ᐊᔥᒋᐱᔨᐦᑖᐅᒡ ᑎᐹᒋᒨᓯᓂᐦᐄᑭᓂᔨᐤ
ᐅᐦᒋ ᐊᓐ ᑳ ᓂᑑᒋᔅᒑᔨᐦᑖᑭᓂᐎᒡ ᐋ ᐃᑖᔨᐦᑎᒥᐦᐄᐙᒡ ᑭᔮᐦ ᐊᓐ ᑖᓂᑖᐦ ᑳ ᐃᐦᑎᒡ ᐋ ᐅᑎᓂᐦᒡ ᐋ
ᒌ ᐹᒋ ᐱᒋᔅᑎᓂᑭᓂᐎᔨᒡ ᒑᒀᔨᐤ ᒫᒀᒡ ᐊᓂᔮ ᒧᔖ ᑳ ᓂᔥᑐᔨᓈᓂᐎᔨᒡ ᐅᐦᒋ ᐊᓂᔮ
ᑎᐹᒋᒨᓯᓂᐦᐄᑭᓂᔨᐤ ᐋ ᐃᔑ ᑖᐦᑭᐦᐄᒑᐱᔨᔨᒡ ᒑᒀᔨᐤ ᐱᒫᑎᓰᐎᓂᐦᒡ ᑭᔮᐦ ᐊᔅᒌᐦᒡ, ᐙᔥ ᐋᔪᐎᒄ ᐅᔮ
ᐋ ᐅᑎᓂᐦᒡ ᑭᔮᐦ ᒑᒃ ᒫᔮᒡ ᐊᓂᔮᐦ ᐙᒋᐦᒡ ᑳ ᐱᒥᐱᔨᐦᑖᔨᒡᐦ᙮ ᒧᔖ ᒑᒃ ᐙᐱᐦᑏᐙᓂᐎᐤ ᐊᓐ
ᑎᐹᒋᒨᓯᓂᐦᐄᑭᓐ ᐊᓂᑦᐦ ᐋ ᓅᑯᐦᑖᑭᓂᐎᒡ ᒑᒀᓐ COMEX ᓂᑑᒋᔅᒑᔨᐦᑎᒧᐙᑭᓂᐦᒡ ᒥᔔ ᑳ
ᐅᔮᔨᐦᑎᐦᒃ ᐊᓐ ᑳ ᐱᒥᐱᔨᐦᑖᑦ ᑖᓐ ᒑ ᐃᔑᓈᑯᓂᔨᒡ ᐊᓂᔮ ᐋᐱᑎᓰᐎᓂᔨᐤ, ᑭᔮᐦ ᐋᐅᒄ ᐄᔅᒄ 45
ᑎᐦᑐ ᒌᔑᑳᐤᐦ ᒥᔔ ᑳ ᐅᑎᓂᐦᒡ ᐊᓂᒌ ᑳ ᒫᒨᐱᔥᑎᐦᒡ ᐋ ᐙᐙᐱᐦᑎᐦᒡ ᐋ ᐃᔅᐱᔨᔨᒡ ᒑᒀᔨᐤ᙮ ᒥᒄ ᒫᒃ
ᒋᑭ ᒌ ᐃᔑᓈᑯᓂᔨᐤ ᐊᓐ ᑳ ᐱᒥᐱᔨᐦᑖᑦ ᒑ ᒌ ᓂᑎᐙᔨᐦᑎᐦᒃ 30 ᑎᐦᑐ ᒌᔑᑳᐤᐦ ᒦᓐ ᒑ ᒌ
ᐋᐦᑎᓂᑭᓂᐎᔨᒡ᙮